5**中文讀書心得分享
文言文溫習方法
【想睇曬全文就撳文章標題啦】 其實文言文真係好straightforward，你明就識答，唔明就唔識答，唔會好似白話文咁明明睇得明字面意思但係都係唔識答。⠀⠀所以我會建議你地做呢d野：⠀ 1）溫熟範文。範文裡面都有d常見字詞，你熟左嘅話咁會對你睇unseen嘅文言文有d幫助，同埋你都可以observe下d句子嘅結構啊 語氣助詞啊咁樣⠀2）如果你個底唔好，咁就最好每日睇少少文言文，例如每日睇一篇，嘗試理解左之後再睇番白話文語譯。尤其係中四五嘅同學，用呢個方法會好d，因為你唔需要特登死記硬背都可以慢慢改善你嘅文言文。⠀3）如果你個底唔好，咁就可以試下買d雞精筆記背d常見嘅文言文字詞。但係我真係唔係咁鼓勵呢樣嘢，只不過係當你時間有限（ie 2020dser）、唔可以只靠慢慢浸你嘅文言文嘅時候，你先好用呢個方法。呢個係一條捷徑，但係唔係最好嘅學習文言文嘅方法，所以呢個係last resort。⠀⠀如果你個底本身好，已經睇得明大部分篇章，咁其實我覺得你唔需要再曬時間去溫文言文，因為你再溫你獲得嘅額外分數其實好少，咁你倒不如擺d時間落去溫其他野好過⠀ ……💯💯💯想知道你未來嘅溫習方法係點、想有人解答下你一d學業問題可以訂購我最新推出嘅高質一對一諮詢服務！
中文卷三溫習方法
⠀【想睇曬全文就撳文章標題啦】卷三係最值得投資嘅中文分卷，等我講下我係點樣溫卷三架啦 我嘅溫習方法基本上就係做mock、睇sample、對比。⠀⠀我由九月開始做左好多好多份某補習名師派嘅卷三mock，做完份mock之後我就會攞佢篇範文同埋data file做對比，呢個研究卷三嘅過程其實通常都耐過我本身做一份mock嘅時間，但係呢個過程真係收穫豐富。⠀⠀咁我會點樣研究卷三marking呢？⠀1. briefly睇一次篇範文⠀2. 仔細研究範文每一段，用唔同顏色highlight pen highlight低唔同嘅野，例如語境意識、結構、整合、拓展、例子 etc⠀ 詳情👇🏻⠀結構：highlight人地篇文每一段嘅結構（例如係果d承上啟下句子、d topic sentence、concluding statement、標示語等等會令結構更加好嘅句子或者詞語），同埋留意下人地每一段大概寫幾多個point或者佢點樣分唔同嘅層面/point，亦都要睇下人地嘅過渡段點寫。記得要同自己篇文做對比！睇下自己結構上可以點樣improve，例如自己加番個箭嘴提番自己自己結構上漏左d咩。同埋分析下頭尾兩段包含d咩元素，例如首段一開始要多謝校方支持，之後要……最後要……⠀⠀語境意識：highlight人地篇文有d咩地方係顯示到佢嘅語境意識，例如會唔會有d咩句子/詞語係同你嘅身份有關呢？或者會唔會有d咩詞語或者句子係同呢篇文嘅文體有關呢？（例如演講辭裡面嘅interactive嘅詞語）同自己篇文做對比！⠀⠀整合：將每一段範文同個閱讀材料/聆聽資料做對比，highlight番d閱讀材料/聆聽提供左嘅資料，咁你就可以知道邊一d係佢抄資料、佢抄幾多資料、佢點樣將d資料分成唔同part去爆point（eg 資料某一句佢點樣分做三part去論述）⠀⠀拓展：highlight番/underline番d拓展嘅位，等你知道邊d位係佢根據個point去吹出黎嘅，同埋你最好自己分析下佢係點樣拓展（eg 用d咩技巧？）⠀⠀例子：highlight番佢邊d位用左例子⠀⠀記得highlight曬d野之後都要同自己果份做對比，睇下自己差d咩，提番自己下次唔好漏/做好d⠀⠀我自己都有份notes係抄低番d常見嘅拓展方向，當我見到份卷裡面有d拓展方向係經常性出現嘅話（例如文化傳承 個人成長）咁我會抄低果d拓展嘅steps或者一d常用嘅字眼，等我下次見到差唔多嘅topic嘅時候都可以apply番d野落去⠀⠀除左呢d之外，記得要背番每種文體嘅格式！格式分最易攞 冇理由唔熟悉d格式掛⠀⠀想知道我操卷三嘅過程中發現左d咩skills？不如參加我同 @hkdse.gayauuu 聯合舉辦嘅卷三摘星衝刺班啦😍
議論文結構
【想睇曬全文就撳文章標題啦】議論文嘅結構好重要！⠀呢句可能你覺得係老生常談，但係我都要再喺到強調多一次，等我同你地講下點樣先為之一個好嘅結構先～ ⠀我果陣都聽過老師提我地要層次分明但係一直都冇真係意識到結構究竟有幾重要，或者具體點樣做先可以令個結構好d，直至到我交文俾我果個曾經擔任dse卷二marker嘅遠房親戚睇嘅時候，睇番佢俾我嘅comments我先好似開左竅咁明白到點樣先可以做到層次分明。層次分明，用我果個親戚嘅說話黎講就係「分論點由淺入深，或由輕到重，層層遞進」⠀⠀等我用我dse果篇文做個示範先：⠀⠀2019 Q3:俗語說「萬般皆下品，唯有讀書高」，也有人說「讀書無用」。試寫作文章一篇，談談你對「讀書無用」的看法。⠀⠀段1: intro，表明立場：反對⠀段2: 讀書能使人獲得知識，繼而取得成就⠀段3: 讀書能使人拓闊眼界⠀段4: 讀書能使人培養品德、明白道理⠀段5: 讀書能推動人類文明的進步⠀段6: counter argument：很多名人也放棄讀書，最終也成就事業 + 駁論⠀段7: 然而，讀書不是萬能的⠀段8: 重申立場+昇華（學會融會貫通、用智慧實踐所學而非囫圇吞棗）+總結⠀⠀咁你可以見到我篇文系真係由輕到重嘅，一開始係講個人層面（成就，之後就係個人嘅見識，再之後就係再高層次d嘅品德/明白道理果方面），之後係講社會層面讀書點樣推動人類文明嘅進步。喺講完我最主要果幾個point之後就係駁論，再之後就講番雖然讀書係有用嘅但係佢唔係萬能，最後再黎多個昇華。咁樣鋪排篇文會好過你諗好多個讀書嘅好處然之後唔分先後次序咁是但dum曬d野入去。⠀⠀又等我用下我之前作嘅另一篇文做示範先。⠀⠀題目：談責任⠀⠀段1: intro⠀段2:個人層面：自己在不同場合eg學校、家庭需要負上什麼責任+不負責任會帶來什麼效果⠀段3: 社會層面：在社會之中，人人負好責任才能令社會穩定、帶動社會進步⠀段4: 政府：政府須負上很大責任，政府不負責任會帶來很大的負面影響，故越是位高權重的人，若他們不盡責，則越會帶來更加大的影響⠀段5: 過渡段：有幾類負責的人是十分值得敬佩的⠀段6: 第一種值得敬佩的人是將國家狀況和人民福祉視為己任的人⠀段7: 第二種是主動肩負起原本不屬於他們的責任的人⠀段8: 第三種人不惜犧牲生命完成責任⠀段9:總結⠀⠀呢篇文分左兩大部分。⠀第一大部分就係講緊唔同人喺唔同場合負責任嘅重要性（個人⏩社會⏩政府/國家）你可以見到個鋪排係層層遞進嘅。⠀第二大部分就係講緊一d值得敬佩嘅負責人嘅人（視天下為己任⏩肩負起不屬於自己的責任⏩不惜犧牲生命完成責任），個鋪排亦都係層層遞進嘅。⠀⠀marker俾嘅評語：「結構嚴謹，有層次」⠀⠀咁自己作文嘅時候點樣做先可以有個好好嘅結構呢？做法就係諗曬d point之後一定要預先鋪排成篇文嘅脈絡（即係d point嘅先後次序係點）、包裝d points搞到懶係有層次咁，make sure個結構係真係由淺入深/由輕到重。 ⠀⠀
議論文例子
【想睇曬全文就撳文章標題啦】例子係議論文不可缺少嘅一部分黎嘅，可能好多人都唔係好知點樣有效咁記例子,咁就等我講下點樣記例子啦⠀ ⠀1. 運用你所學過嘅嘢！⠀⠀我其實冇特登背d古代嘅例子，因為我本身鍾意中史、睇好多歷史書/劇、dse讀中西史，腦裡面已經儲左好多例子，都已經夠我dse用。如果你都係讀中史/history，咁你都可以嘗試作文運用多d你學過嘅嘢（尤其係如果你中史讀知識份子果個單元！）（文革、辛亥革命、維新、大躍進都好好用），或者你亦都可以再根據你學過嘅嘢再深入d咁搵多d資料，例如係搵多d gorbachev/churchill/唐太宗/孫中山嘅生平事蹟同埋背景，因為你原本已經對佢地有少少認識，所以要記多d佢地嘅嘢都幾容易。⠀⠀除左係history/中史之外，你中文學過嘅嘢、LS學過嘅時事議題甚至乎你平時新聞見到嘅嘢都可以係例子黎架，所以作文嘅時候唔好將自己局限喺你特登背嘅例子裡面，好多時候你已有知識裡面已經有d適合嘅例子架啦！⠀⠀2. 百搭例子⠀⠀之前2015dse狀元 Melody Tam同埋2018dse狀元 Monica Chan都有講過背百搭例子嘅重要性，你可以參考番佢地嘅片/post⠀簡單d黎講，百搭例子即係一d可以用落好多題目果到嘅人物或者事件，例如我偶像韓信可以用落呢d題目到：知恩圖報（一飯千金）、驕傲、忍辱負重（胯下之辱）、以德報怨（胯下之辱）、堅毅不屈、不知人善任（項羽唔用韓信之後韓信走去幫劉邦擊敗項羽）、靈活變通（幾次戰爭出奇制勝）etc⠀⠀大躍進：⠀揠苗助長、忽視現實、知識嘅重要性：以深耕密植等違反科學常識的方法耕種⠀高估自己、太理想化：十五年內超英趕美⠀領袖/責任：造成幾千萬人餓死⠀⠀更加詳細嘅示範： 我男神漢光武帝劉秀 堅毅不屈：經歷過好多困難先可以建立東漢，例如曾經喺河北俾王郎追殺，去到好多日冇野食、冇地方休息嘅地步，好彩佢果陣依然堅持落去，如果唔係中國歷史上面就唔會有「東漢」嘅出現 有大志：原本喺鄉下耕田，但係佢見到王莽篡漢後統治無方，作為漢景帝後裔佢就立志要匡扶天下，二十七歲參加起義，三十歲登基成為皇帝，建立東漢 能屈能伸：佢同哥哥劉縯成日俾更始帝劉玄猜忌，之後更始帝就搵藉口處死左劉縯，為左唔令到劉玄加害埋佢，劉秀就要扮冇嘢，冇服喪，去同劉玄謝罪，平時吃喝如常，後尾劉玄見到佢咁樣就因為瑰疚所以冇迫害到佢，佢之後先有機會藉住出使河北嘅機會脫離劉玄控制 不計前嫌：朱鮪曾經參與過劉玄殺害劉秀哥哥劉縯嘅陰謀，但係劉秀後來為左大局著想，發誓唔會殺佢，勸降左朱鮪，仲封朱鮪為侯添 把握時機：劉秀趁住俾劉玄派去出使河北D嘅機會培養勢力，最終擺脫左劉玄嘅控制，得以脫離險境同埋建立東漢 推心置腹：劉秀擊敗左銅馬軍之後將佢哋收編入自己軍隊，但係銅馬軍士卒憂心忡忡，驚自己唔會俾劉秀善待，為左釋除佢哋嘅疑慮，顯示自己當佢地係自己人，劉秀隻身前往銅馬軍嘅軍營巡查，安撫佢哋，佢地見到劉秀竟然可以咁無戒心咁入佢哋嘅軍營就個個釋除曬疑慮 不拘小節、有大局觀：有場戰爭綠林軍擊敗左其他軍隊，幾個兵系就開始搶奪戰利品，為左防止內部分歧，劉秀讓左d戰利品俾其他兵系 勇於面對挑戰：王莽40萬軍隊迫近昆陽，昆陽又只係得8000-9000守軍，昆陽各位將領都主張棄城逃走，但係劉秀覺得撒軍、分散兵力一定好難保全倒實力，所以極力勸說其他人勇敢迎戰。大家決定左迎戰之後，劉秀只係帶左13個騎兵就趁夜晚突出重圍去搵援兵，後尾劉秀以2萬幾人擊敗40幾萬人，為綠林軍帶黎決定性嘅勝利 唔駛記好多唔同嘅例子，但係又可以應用到落唔同嘅題目到，呢d多用途例子係咪好正呢？但係上面呢d只不過係冰山一角，呢d例子仲有大把拓展角度，而且除左呢幾個例子之外，世界上仲有好多呢類型嘅百搭例子。想要更多百搭例子嘅話，就快d訂購我嘅中文萬用神例集啦！⠀⠀3. 古今兼備！⠀我有個遠房親戚做過dse 卷二marker，我交過篇文俾佢睇，果篇文我有好多古代例子但係冇乜現代例子，所以佢俾我嘅分唔係好高，佢話例子最好古今兼備，因為作文「基本上是扣連現今社會、生活、待人處事」，marker會鍾意見到一d你對現實生活嘅反思，所以最好都具備現今事例，唔好只係寫古代例子。⠀⠀4.背幾多例子先夠？⠀你背例子應該質量兼備，如果你背嘅例子應用到嘅地方好少，咁你背100個都未必夠用，如果你背多用途例子，而且果d例子真係非常常用嘅話，咁可能20個都已經夠。我唔會話你背幾多個一定夠或者一定唔夠，因為都真係好睇你d例子係咪可以應用落好多題目到，當然你如果冇背過例子咁濟而且本身冇咩例子嘅話，咁就一定唔夠，始終議論文裡面例子係好重要嘅一部分。⠀你問我背左幾多個例子入去，我真係唔知，因為我古代果d本身已經識，好難特登去數我識幾多個古代例子，至於現代例子我就大概臨急抱佛腳咁背左10-15個多用途例子左右啦。⠀⠀5.去邊度搵例子記？⠀1️⃣已有知識 ⠀2️⃣YY常規班筆記嘅多用途例子部分⠀3️⃣YY果d例子書仔（中外例子集成/古今例子集成）⠀4️⃣我嘅中文萬用神例集!⠀⠀6. 幾時開始記例子？⠀如果你本身識嘅例子好少，咁我建議你個禮拜（甚至每一日）記一個多用途例子，嘗試將呢個變成一個習慣，咁去到dse嘅時候你就一定夠例子啦。但係要記得定期重溫返啊，如果唔係果左一陣你就會唔記得曬架啦。⠀如果你本身識嘅例子比較多，唔需要背太多例子，咁其實都可以遲少少背，例如study leave果陣背或者好似我咁臨考果個禮拜先臨急抱佛腳係咁背例子 ⠀
中文寫作：議論文vs記描抒
【想睇曬全文就撳文章標題啦】作文嘅時候，好多人會遇到一個難題，究竟作議論文定係記敘/描寫/抒情文好呢？依家就等我講下 議論文 同埋 記描抒 攞高分嘅要求、兩者嘅好處/壞處 同埋咩人啱寫咩文體啦。⠀ ⠀⭐️議論文點攞高分？（放心，之後會逐樣開po講）⠀⠀👉🏻論述飽滿：例子豐富、推論好⠀👉🏻結構：層次分明，結構清晰⠀⠀⭐️記描抒點攞高分？⠀⠀👉🏻內容：立意深遠、俾佢見到你諗嘅野好有深度、能夠觸動倒marker內心深處、令人印象深刻、情感真摯、富有啟發性⠀👉🏻文筆：好！⠀⠀⚠️想攞5**嘅話你 EITHER1️⃣「文筆普通+內容超好」 OR 2️⃣「文筆超好+內容ok好」 都已經夠，當然文筆、內容兩樣都好就緊係最好啦⠀⠀咁議論文同埋記描抒有咩好、有咩唔好呢？⠀⠀議論文：⠀👍🏻發揮穩定（我臨考之前不斷作，分數次次都係66-69呢個range，dse分數都差唔多（70）（sad，太多錯別字導致我差一分先5**…））⠀👍🏻容易操練（論述技巧、結構作多幾次就熟）⠀👍🏻相比起記描抒，d marker俾嘅分數variation冇咁大，因為議論文唔係太牽涉情感，所以主觀成分冇記敘文咁大⠀👍🏻易扣題，風險較小（通常最多只不過係「牢牢緊扣題目」同埋「扣倒題」嘅分別）⠀👍🏻因為議論文用嘅descriptive language比起記描抒少好多，所以文筆嘅分別冇記描抒咁明顯，對文筆普通嘅人黎講，喺「表達」攞高分冇記描抒咁難⠀👎🏻好靠平時儲落嘅例子，當你遇到一條題目諗唔到任何例子嘅話就gg，成篇文都只係吹水冇任何實質例子嘅話要高分近乎冇可能咁濟（不過，依家有個好消息：你地可以訂購我嘅中文萬用神例集，幫你DSE裡面考到好成績！）⠀👎🏻亦都係因為議論文唔係咁牽涉到情感，marker好難因為被感動到而好欣賞你篇文，比起記敘文，議論文難攞80幾90幾分好多（不過71就已經5**，你又未必需要追求咁高分）⠀⠀記描抒：⠀👍🏻寫記描抒攞80幾90幾分嘅機會會大過議論文（因為如果marker俾你感動到/啟發到，咁佢哋就會俾好高分你）（但係攞80幾90幾分嘅人真係極少，佢地通常係文筆同內容都極佳）⠀👍🏻唔需要花大量時間背例子，只係需要提前諗定d故事⠀👍🏻就算已經諗定嘅故事用唔著都好，你即場作個故事都ok，唔似議論文咁你提前準備嘅例子用唔到就作唔到篇文⠀👎🏻文筆差嘅話會相對輸虧d（文筆差好難令到marker俾你感動到，同埋文筆好果d真係會好得好誇張，文筆嘅分別都幾明顯下，所以比較難喺「表達」果到攞高分）⠀👎🏻風險較大（因為好睇題目係咪開正你果範、你即場發揮eg諗故事橋段、marker有冇俾你觸動倒……萬一唔好彩你諗唔到一個好嘅故事，咁就可能會比較低分）⠀，成績飄忽不定👎🏻離題/偏題機會較大⠀👎🏻marker評分差距大，所以好睇你運氣，睇下自己遇著d咩marker（因為可能有d marker覺得好感動，有d覺得普普通通）⠀⠀議論文啱d咩人寫？⠀👉🏻平時睇好多歷史書/新聞嘅人（呢d人例子會豐富d，唔駛特登背好多例子）⠀👉🏻文筆普通而且平時記描抒諗唔到d好好嘅內容，而又想攞5*/5**嘅人（同埋肯花時間背例子嘅人）⠀👉🏻其他卷都ok，唔需要單單依靠作文呢一份卷拉上5*/5**嘅人（因為議論文最高分果d通常都係60尾/70幾，最盡可能去到80頭，基本上冇咩可能去到90幾）⠀⠀記描抒啱咩人寫？⠀👉🏻細細個就睇好多金庸小說、一直都浸淫喺中文呢個世界裡面、文筆令人嘆服嘅YY2.0、YY3.0⠀👉🏻creative、成日諗到好好嘅故事嘅人⠀👉🏻其他卷唔好，想靠作文拉上5*/5**嘅人（記描抒低分嘅可以好低分，但係高分嘅都可以超級高分，高分嘅可以去到80幾甚至90幾，當然個前提係你文筆好+內容好）（但係80幾分90幾分嘅人真係好少，如果你冇呢個能力，唔好不自量力咁為左攞80幾90幾分而揀記描抒）⠀⠀以我自己為例子啦，我呢文筆普通，絕對唔係果d YY2.0/YY3.0（我成世都唔會寫倒佢地嘅佳詞佳句），又諗唔到好有深度嘅內容，作記描抒一時ok一時幾差，成績飄忽不定。另一方面我本身好鍾意中史，平時都睇好多中史課外書/劇集，又讀雙史，所以我本身識嘅例子自然多過常人好多，所以議論文係我嘅perfect choice。（小廣告：如果你本身冇咩⠀，可以考慮購買我嘅中文萬用神例集） ⠀我自問唔係作文嘅專家，所以以上嘅都只不過係我嘅個人意見，如果有d咩唔係咁準確嘅地方希望各位理解，亦都希望大家決定專攻邊個文體嘅之前咨詢下你地嘅老師/補習老師，我唔想大家做錯決定。但係我都要提番各位，你地最好都係要有兩手準備，唔好局限自己於某種文體或者只係操某種文體，最好兩個都掂下，make sure就算考dse嘅時候因為唔知咩原因（eg突然間諗唔到d例子/諗唔到故事）作唔到自己原本專攻嘅文體嘅時候，都可以照作另一個文體，唔好話作唔到記敘文/議論文就方寸大亂、完全唔知點算好。⠀
範文：Tip題
【想睇曬全文就撳文章標題啦】2020年範文會出咩？呢個係好多人問嘅問題，所以依家都會解答翻大家嘅問題。帶番個頭盔先：我唔係考評局，唔會知道考評局會出乜唔會出乜（知嘅話會俾佢請左去飲咖啡），所以我唔能夠100% guarantee話佢一定唔會出邊篇範文，tip得題就肯定有風險，請你地自己衡量下風險大唔大同埋評估下自己嘅風險承受能力先好tip題 咁我果陣呢就係tip題嘅，由於2018已經出左《青玉案》《出師表》《勸學》，所以基本上呢三篇我係冇乜點溫嘅，由於《青》出得比較少，得1大題，而另外兩篇出嘅篇幅都幾多下，所以理論上佢翻炒嘅機會應該會大過其餘兩篇，再加上佢好短好易背，所以我都有背到嘅（不過熟唔熟就係另一回事），其他兩篇就真係冇嘗試背過（除左好耐好耐之前學校有出師表嘅默書之外，不過其實我唔記得曬）。三篇嘢我都只係睇一睇佢個主旨同埋作者想講乜咁就算，冇好深入咁溫（冇時間+唔值得），更加冇睇課文問答…我就只係好仔細咁溫呢3篇嘅語譯，因為我覺得就算係翻炒，9成都只係會出語譯（考評局唔會第二年就翻炒得好勁，因為一定會俾人鬧爆，同埋差唔多所有人都冇溫、唔會識，咁中文又會好多人肥…）（事實上考評局2019的確用出師表同埋勸學各自出左題語譯，我諗佢就係想防止d人見到2018出左而完全溫都唔溫果兩篇）我個人就唔會完全排除佢翻炒長題目嘅可能性，但係我覺得佢應該唔會玩嘢玩得咁盡（畢竟中文係必修科，同埋佢設立範文就係為左唔好再令中文俾人叫做「死亡之卷」）。我果年第二年有範文，考評局唔會咁快玩嘢住，所以翻炒機會真係極微（唔計語譯），而你地2020dse係第三年有範文，玩嘢機會一定大過2018/2019（遲早有一年考評局會翻炒，唔知佢會唔會覺得「2020，係時候翻炒下玩下野啦」），所以2018出過嘅一定要溫！，至於2019果d我自己就覺得有翻炒嘅可能性，但係可能性唔係非常大（唔計語譯）（不過就算係翻炒都唔會佔成個範文部分嘅好大比例）。假設我係2020考生，又想tip又想安全d嘅話我就會咁做：《論仁論孝論君子》同埋《始得》2019出得比較多，理論上翻炒機會應該細d（係翻炒都唔會翻炒好多，應該係，除非唔係🤔），同埋《論》裡面仁同埋君子會重要過論孝（因為2019只係考左論孝），所以如果我係2020dser，我就只係會睇主旨+最基本/常見嘅果幾條課文問答+語譯《岳陽樓記》同《山居秋瞑》2019雖然都有出，但係出嘅篇幅好細好細，問d好簡單嘅野，翻炒機會相對上會大好多，尤其係《岳》只係出左句語譯，所以我自己就會當佢係普通範文咁溫，只不過相比起一d 2019冇出過長題目嘅範文，我投放嘅時間會少d一個簡潔d嘅結論：如果我係2020考生，我溫範文嘅詳細程度（10=最詳細、擺最多時間）：1. 2018、2019都冇出過嘅範文 （10/10）2. 只係2018出過嘅範文 （9/10）3. 岳陽樓記（8/10）4. 山居秋瞑（7/10）5. 論仁、論君子（5-6/10） 6. 論孝、始得（3-5/10）（depends on你想tip得幾盡）以上只係我自己嘅處理手法，你可以自由選擇跟唔跟我。因為tip題一定有風險，所以最安全嘅做法緊係溫曬啦，但係溫曬會浪費好多時間，所以你地要自己衡量風險同埋你地嘅風險承受能力，再選擇tip唔tip題、tip題嘅話tip得幾盡、跟唔跟我嘅方法。由於我唔係考評局，所以我唔知佢究竟會出咩，guarantee唔到我嘅處理手法真係可以確保萬無一失，到頭黎都係睇番你自己嘅諗法啦。
中文範文點溫？（二）
【想睇曬全文就撳文章標題啦】上次就講左點背範文啦，咁今次等我講下課文問答、語譯、時間分配果d先🤣 2. 課文問答範文最重要就係要明白作者想表達d乜嘢、篇文嘅中心思想係乜嘢、篇文有咩特色etc，明左之後你就會發現其實每篇嘢問黎問去都係問果d野，例如《岳陽樓記》問黎問去一係就問d描寫手法/感官描寫，一係就問作者寫作目的/點解咁咁咁寫（其實答黎答去咪又係話佢想以天下為己任果d）；《六國論》答黎答去都係話六國唔應該賂秦，希望北宋唔會重蹈六國嘅覆轍…所以係咁睇課文問答係好重要架。我自己就係睇教科書、學校工作紙同埋《高中文言文閱讀全解》，裡面d分析幾好，睇完係真係會完全明白作者點諗。所以大家記住睇多d雞精書/教科書嘅問答啦。另外呢，12篇範文裡面《出師表》《廉頗》《六國論》《始得》《念奴嬌》《青玉案》《論仁》《論君子》呢d全部都曾經係會考嘅範文，所以你覺得教科書/雞精書唔夠嘅話都可以search下呢d篇章嘅會考題目做下（我太懶所以冇）3. 字詞解釋make sure 每 一 隻 字你都知道解釋，確保語譯果幾題萬無一失。同埋要留意有d字會同時喺幾篇文裡面（甚至係同一篇文裡面）出現幾次，但係佢每次出場嘅情景未必一樣，所以佢每次嘅意思都可能會唔同，所以同一隻字你要記清楚喺咩情況/句子裡面佢有咩意思。4. 擺幾多時間落範文範文其實只係佔成科中文科嘅7%左右，所以雖然呢一part一定要溫熟，但係我唔會建議擺太多時間喺範文度，因為當你已經熟悉左d範文，你再擺更加多時間落去，其實你extra得到嘅嘢越來越少，你高分極都唔會超過卷一嘅30%分數。所以當你feel到你已經可以明白文章內容、中心思想同埋作者嘅諗法，應對倒95%嘅題目，其實就可以唔駛再擺太多時間落去今次就去到呢到啦，下次我會講一d策略性d嘅嘢：tip題！敬請期待☺️
中文範文點溫？
【想睇曬全文就撳文章標題啦】 首先呢範文絕對係中文裡面嘅兵家必爭之地，因為得呢一part有可以預知嘅出題範圍，大家都會溫熟呢part，如果呢一part做得唔好，就會相對比較虧底，咁等我講下範文點樣溫先。 1. 背我將所有範文（除左太長嘅《廉頗藺相如》同埋2018出過嘅《出師表》《勸學》《青玉案》之外）全部背熟。因為dse有機會叫你摘錄原文，同埋好多時問答題個答案只不過係原文嘅白話文版，記得曬篇文講咩、篇文嘅鋪排絕對有著數。為左唔好去到dse先一次過背曬d範文咁痛苦，我九月開始坐車去補習嘅時候我有時都會帶住本樂思出版嘅《高中文言文閱讀全解》，趁住坐車嘅時候將d範文逐d逐d咁背好，令範文變成我嘅長期記憶。咁去到dse嘅時候我就冇額外花時間去背範文。咁到底點樣先可以易d記到d範文呢？ 👉🏻理解記篇範文之前一定要理解左佢先，你一定要理解每一句嘅意思同埋每一段究竟講緊乜你先好開始背，唔係嘅話你嘗試背嘅只不過係一堆對你黎講毫無意義嘅字，咁同你唔識法文走去背法文文章係冇乜分別架。如果你理解埋作者嘅思緒同埋文章嘅logic flow，咁就再易d背添👉🏻圖像記憶法我地嘅大腦記圖像同埋一d勾住喺一齊嘅野（例如故事咁，記得一個情節就記得下一個情節）記得比較好，所以儘量將範文內容轉化爲圖像/故事咁，咁就易記好多。例如：➡️「陰風怒號，濁浪排空；日星隱耀，山岳潛形；商旅不行…」：我會想像一個畫面，就係陰天，好大風，d風「怒號」，咁你讀個「號」字出黎果下都feel到有d風出左你個嘴，然後就想像果下嘅風一吹落水面就搞到d浪沖上天空，然後你嘅想像就會翻番個天空到，天空上面有d星同埋有太陽冇左光芒，搞到睇唔到d山，而你放大d山黎睇就會見到d商人同旅客…我腦裡面嘅圖像可以望下面幅圖，雖然我畫畫好核特，但係個point係大家要有個image喺腦裡面 ➡️論仁論孝論君子太多散修修嘅句子，所以我就搵辦法將d句子串連埋一齊，等我可以up齊曬每篇有咩句子，咁我腦裡面就想像緊一個故事：有一日，我覺得自己太肥可能有病，所以去醫院量體重（1.君子不「重」則不威），但係為左量得準確d佢要我除衫先可以去量 （2.坦蕩蕩）（呢個情節的確唔係咁appropriate，但係要記到坦蕩蕩呢個應該係最易記嘅情節🙈）所以我就有d驚（3.不「憂」不「懼」），然後到我入去量體重，由於冇著衫所以就要有塊廉遮住，塊廉就代表🔞（4. 不 「成人」之美），入到去個醫生見到我就話我冇想像中咁肥（5.言而過其實），咁我就話「你正面睇的確無野，但係我側跟好多肉，你睇下側跟啦」（6. 義以爲質，質 側 同音），個醫生望一望我側跟d肉發現我真係好肥，係肥到有病果種，就話「哇！你病緊wor！」（7.君子不「病」人之不己知），所以我就下跪求個醫生醫好我（8.君子 「求」諸己）。就係咁就記得曬「論君子」裡面嘅句子啦，論孝同埋論仁我都有作其他故事，不過我覺得論君子呢個最易記同埋最demonstrate到我記憶方法嘅原理，所以就post上黎同大家分享（希望大家唔好介意個故事有d奇怪啦哈哈）（事實上個故事越天馬行空越離奇就越易記🤣)碌落去可以睇下我腦裡面嘅畫面 ➡️西山就可以想像下你係個作者，一路picture d image，例如爬上西山嘅過程、西山望落去嘅風景，一路嘗試想像同理解作者嘅感受同埋思緒👉🏻恆常性複習唔好背完一次就算，記得隔一陣就再複習多次，如果唔係可能好快就會唔記得。一開始可以隔一日，之後隔一個禮拜，再之後隔個月（呢個係上網睇到嘅記憶方法）
Follow My Blog
Get new content delivered directly to your inbox.
DSEHIGHBANANA 