【想睇曬全文就撳文章標題啦】眾所周知，中史好多野背，咁點樣先可以背得有效率d、易d記得呢？
首先，‼️請你一定一定要理解同埋消化左d內容先，你如果唔理解唔消化咁係好難去死記d facts架，最好當故事咁背，唔好當係一段段好悶嘅文字咁記！
然之後呢，其實我絕大部分時候都係同大家一樣就咁背，冇咩特別，但係當我真係真係記唔到嘅時候就會用d特別d嘅記憶方法：
👉🏻for d數據：近代史有超多數據，例如一五大躍進文革改革開放，數字會好多，例如可能改革開放令人均gdp由1978年嘅$xxxx 上升到1999年嘅$yyyy，咁其實呢個資料裡面你已經需要背1）1978 2）xxxx 3）1999 4）yyyy四組數字，而我自己就會攞部cal機計番個倍數/percentage increase，然後只需要背兩樣野：1）21年間 2）上升約ZZ% or W倍
同埋好多時候，除非係d重要數據（例如三反五反幾多人被抓etc），否則，好多數據我只會round off，寫約數就算，例如1234萬，我會寫「約1200萬」
👉🏻for 人名/地方名
有d人名/地方名比較難記，當我真係記唔倒嘅時候我會用好多唔同嘅（白痴）方法去記 好白痴但係真係work 唔好笑我！
eg 唐朝河北三鎮本身個地方名同埋各自對應嘅節度使嘅名都比較難記
咁我就諗：
魏博➡️ 魏博士=Dr. Wei （大陸節目最強大腦果個心理學教授）
成德➡️成duck
盧龍➡️無限挑戰有個前成員叫盧洪哲，花名係盧志龍
點樣記曬河北三鎮？我就諗：Dr. Wei 將盧洪哲 變 成 左隻 duck ，咁就成功link曬果三個地方名喺一齊
點樣記邊個地方個節度使係邊個？
田承嗣➡️個「魏」字裡面有個「田」，所以田承嗣係魏博節度使
李寶臣個寶諧音堡，同成德個成（諧音城）一齊合體成「城堡」呢個詞語，所以李寶臣係成德節度使
李懷仙➡️仙同埋龍都係一d神話傳說之中有嘅野，所以李懷仙係盧龍節度使
eg韋堅鑿廣通潭，便利漕運➡️我對廣通潭嘅評價：喂，堅喎! ➡️喂（韋）堅
eg高熲廢除酷刑➡️go （高）away，酷刑
eg開皇律：蘇威、牛弘➡️被開國皇帝任命制定律法，so（蘇）牛👍🏻！
👉🏻政策
有時難記d嘅野就會用d特別d嘅記憶方法：
⭐️思考d原因/作d原因俾你自己方便記（你唔知d原因係咪真，所以唔好寫埋落去！）
eg 孝文帝、隋文帝 時期的均田制
| 孝文帝 | 隋文帝 |
| 滿15歲男：桑田20 畝，露田40畝 | 滿18歲男：永業田 20畝，露田80畝 |
| 婦女：露田20畝 | 婦女：露田40畝 |
| 露田70歲／死後歸還 | 露田66歲／死後歸還 |
咁可以見到：
變化1:受田年齡及歸還年齡➡️自己ff d原因：北魏統治嘅主要係北方人，北方人強壯d（你諗下d山東人😂💪🏻同埋果d鮮卑人呢d遊牧民族），15歲已經夠力耕田，同時因為佢地強壯d佢地亦都長命d，所以好多人70歲都未死。隋朝統治埋中原人、南方人，佢d身體虛弱d，自然要遲d先夠力耕田，早d死
變化2:桑田改稱永業田➡️ff原因：隋朝統一中國，隋文帝建立左永垂不朽嘅事業，所以佢個田都要配合佢嘅豐功偉績叫永業田
變化3: 男女露田數量double左➡️ff原因：隋朝統一全國，有多d土地，自然可以派多d土地俾每一個人
⭐️用logic flow
開皇之治政治方面有好多改革措施，點樣可以記得曬所有措施呢？就係用logic flow。
首先，每個政權一定有政治大體制（改革政制），然後呢個大體制裡面d人，即係d官員，點樣黎架呢？（開科取士）咁有左呢班官員，你點樣ensure佢地嘅quality呢？（澄清吏治）咁好喇，maintain到官員質素之餘你都要maintain平民嘅質素架嘛，咁點做呢？（改良刑法）搞左咁多野，呢個皇朝應該好 「興」盛啦 （建大興城）
用呢個logic flow就可以好簡單咁串連起曬隋文帝嘅政治措施啦（改革政制、開科取士、澄清吏治、改良刑法、建大興城）
當你真係記唔倒嘅時候，就嘗試下用我上面講嘅果幾種記憶方法啦，記住天馬行空咁ff d野都得，越誇張其實越容易記得！
DSEHIGHBANANA 