【想睇曬全文就撳文章標題啦】見到好多2020dser已經開始努力溫習，好多studygram都post自己整嘅靚notes，我覺得你係咁勤力的確係一件好事👍🏻但係希望大家諗清楚，你地係咪真係有必要花咁多時間整咁多notes呢？整咁多咁靚嘅notes係咪真係咁重要？用咁多時間整notes係咪值得？又或者你整notes嘅方法係咪最理想呢？
我覺得notes對每個人嘅幫助都唔同，有d人覺得整notes先溫到書，有d人整完notes都冇用過, but generally，我希望分享我對於整notes嘅睇法，純粹係個人意見，你唔一定要100%跟足，因為每個人嘅學習模式都唔一樣。
以下呢幾類係我有寫嘅notes，我都建議大家可以寫呢幾類notes🙆🏻：
✅錯題簿
我maths、econ都有寫錯題簿，每當我錯左一題/對答案唔肯定/econ 長題目中唔曬marking/maths用左d正確但係慢嘅方法，我都會寫低自己錯左果題，寫我原本嘅答案、正確答案+解釋、點解我原本嘅答案/方法/諗法有錯（會唔會係我忽略左d乜嘢，又或者我理解有誤？）而由於我屬於極度唔小心嘅人，我通常都會錯超多careless，例如經常性duk錯cal機、睇錯題目、寫寫下step抄錯數字、做漏一個分題etc，所以我都會開一頁（之後因為唔夠寫再開多三頁…）專寫我錯過d乜careless mistake，臨考前睇一次提醒自己留意多d呢d位
同埋要抄低題號eg 2012dse Q5a，等自己有d乜問題可以refer返去果條題目到
錯題簿嘅function就係等你知道自己邊d地方做錯、點解錯，寫果時會加深印象，對清concept好有用，之後睇返會提自己唔好犯同樣嘅錯誤
✅總結自己做pp、研究pp marking scheme發現嘅skills
我做中英文paper1、paper3同埋對marking scheme嘅時候發現左好多隱藏嘅skills（遲d會開po講），於是寫低左呢d skills，考之前睇多次
econ我都有寫低某d 我發現左嘅skills，例如好多時候pastpaper都會問「點解明明賣同一樣嘅野，果兩間shop嘅價錢會唔同？」睇過幾條類似嘅題目答案都差唔多，都係咩唔同cost啊、heterogenous product/service果d，咁我就會將呢d答案寫低喺notes到，日後遇到類似嘅題目將呢d答案寫落去就得。然後efficiency果課又係好多keywords會中marking，咁我又係整個list寫低曬呢d keywords，例如deadweight loss, underproduction/overproduction, MSB=><MSC, MPB<>MSB, increase production towards the social efficient output level………做題目嘅時候未必句句有分，但係擺曬呢d keywords落去就應該可以滿分
✅將課本內容太亂、太容易混淆嘅部分寫成個表
中史我冇整notes嘅習慣，但係當有d超級容易mix up嘅內容我就會寫個表，例如近代史各種條約、三個盛世（呢個topic真係攞命，果d咩人口、戶口數量、米價、賦税力役、藏書數量、律令數量、每人獲分派嘅田嘅數量etc 真係超級超級超級容易亂！），會清楚d易記d，一亂就攞返出黎睇
✅內容唔多，將一d喺pastpaper/補習/練習之中嘅嘢incorporate入你嘅notes到，集百家之大成（當然，你都要自己衡量有冇呢個必要，唔好為寫而寫，覺得寫左notes就=溫左好多書咁）
我地汲收嘅知識嘅source好散，有學校課堂/pp/補習，d知識咁散可能會造成不便，好有可能唔係好記得d內容，所以寫notes包曬各方面得到嘅skills/knowledge都幾有用
我math、econ都有寫總結每個topic內容嘅notes（macro only for econ，訂購詳情），因為每課內容其實唔多，寫一寫都唔會用太多時間。maths補習果到俾左好多alternative methods/skills同埋分埋唔同題型點tackle，呢d係學校老師未必會教嘅，而有時候學校老師又俾到一d補習唔教嘅skills我，咁我就將唔同地方學嘅extra skills/內容incorporate入我每個topic嘅notes到，總之我嘅notes就係集百家之大成
econ都係一樣，我儘量將我喺學校學到嘅嘢同做pp得到嘅conclusion融合埋一齊，例如gdp果個topic，有好多嘢計落gdp又有好多嘢唔計，雖然學校俾左個表我，但係都唔齊全，咁我做pp嘅時候見到pp顯示邊d嘢計/唔計嘅時候，我就會將佢加入個計/唔計gdp嘅list 到
以下係我唔係好建議嘅notes🙅🏻
❎課文內容超多嘅notes
見到好多人會用好多時間整d好靚嘅中史notes，但係其實我就覺得冇咁嘅必要…
一黎出版社通常會有d精讀筆記 真係想要d精簡d嘅筆記 用果d都得 無謂浪費時間去整
二黎中史每課內容真係超多 有排整 倒不如用整notes嘅時間去背史實，效率更高
三黎 中史要攞高分 需要詳盡嘅史實 好多時候你整筆記可能會省略左一d細節位，但係往往就係呢d細節位令你可以喺中史攞高分
其他好多內容嘅科都係，會唔會可以買d精讀筆記，而唔係浪費時間慢慢寫notes呢？
❎純總結內容而且有冇都唔緊要、對你幫助唔大、花你好多時間整得好靚但係你又未必睇嘅notes
我一開始都有為中英文、LS寫notes，主要係每一次補習之後總結返果堂學過嘅野+總結返之前補習學過嘅野，中文都有寫埋佳詞佳句，但係後來我發現咁樣做好浪費時間，就冇再寫呢幾科總結補習內容嘅notes
事實證明，我咁做係個非常正確嘅選擇，因為去到考dse果陣，我幾乎冇睇過呢幾份notes，而且呢幾份notes嘅內容對我冇乜幫助
所以大家寫notes嘅時候請諗下：寫完d notes會唔會真係有咁大幫助？你自己會唔會睇番？
你點解會寫notes？純粹因為整靚D，睇得舒服d？（如果係咁，咁我就真係勸你唔好整，嘗試適應下睇textbook嘅感覺啦）因為寫完有滿足感？（我好明白果種滿足感，但係要注意：寫左好多notes係唔係真係可以幫到你咁多，係唔係真係代表你溫左好多書？你覺得寫notes滿足感大d定係用其他更有效嘅方法而攞到更高嘅grade嘅滿足感大d？）如果將你寫notes嘅時間擺落溫其他嘢到，效果會唔會更加好？？
當然，如果你係覺得唔寫notes，只係睇textbook/出版社嘅筆記會令你超級超級超級唔舒服、真係完全溫唔到書嘅，咁你就寫啦 但係請你make sure你寫完真係會睇番d notes
希望上面嘅內容幫到你地啦 如果你睇完都唔知自己應唔應該寫notes嘅歡迎dm問☺️
我具體每一科溫習方法同埋每一科嘅notes係點嘅樣我遲d會再一科科講
以上內容係針對2020dse，因為得返9個月，時間真係唔多，如果仲用大量時間寫notes好有機會溫唔切書。如果你係2021dse而且平時時間好多嘅話，咁你寫下notes都未嘗唔係一種好嘅方法
DSEHIGHBANANA 