【想睇曬全文就撳文章標題啦】
各位應屆文憑試考生：⠀
⠀
話咁快就得返一個月，相信呢個時候嘅你都大家應該喺到努力溫緊書，但係同時，你地依家都可能會覺得好驚、唔知點算好、好無奈、好無力。
作為上年嘅DSE考生，我都完全明白你嘅感受。仲好記得得番一年、半年、100日嘅時候我都會覺得好大獲，但係到第90日嘅時候又反而冇得番100日咁驚，因為可能三個月嘅感覺唔係太近，我未必好有真實感，所以其實我雖然好擔心自己入唔到a1，但係一直都有冇話覺得自己好大壓力，冇d乜特別嘅行為。但係去到舊年嘅呢個時候，我真真正正咁feel到佢真係迫緊埋黎，壓力真係前所未有咁大，差唔多爆煲咁濟。我果陣覺得自己好多野都未溫，覺得自己溫書嘅進度太慢，覺得自己好無用，成日都會怪責自己效率太低，好嬲自己，係咁喺private ig上面埋怨自己。我果陣變得好暴燥，成日都好「mung」，屋企人講一兩句我就會覺得佢好煩，又成日溫溫下書突然間覺得好嬲自己，就喺到猛咁dup/拍我張檯（雖然隻手會痛），又會有時攞d好厚嘅書dum落地下，越大聲我越滿足越relieved，我果陣真係第一次有呢d咁異常嘅舉動，我都估唔到自己嘅壓力積埋積埋原來已經去到呢個地步。⠀
⠀
所以如果你地呢排開始覺得好大壓力，其實都係幾正常嘅，好多人都會經歷呢d野（但係如果個問題真係好嚴重，你可能要去睇下醫生），去到呢個時候其實大家都會覺得好無助好frustrated好自責，但係唔好氣餒，唔好因為咁而好頹好想放棄，唔好成日諗住你一定會考得差。其實理想中嘅你同現實中嘅你其實點都會有d差距，即係無論你幾努力都好，你都會覺得自己應該更努力，你永遠都唔會覺得自己已經夠努力，呢個係人之常情，所以你唔需要過份自責、過份擔心。好多時候，其實你自己已經好努力，你阿爸阿媽覺，你d朋友覺，但係你自己唔覺。俾d信心自己，相信你自己嘅能力，相信你過去呢三年所付出過嘅努力。嘗試搵下自己最有效嘅紓壓方式，唔好將所有嘅負面情緒收收埋埋，試下同其他人分享下你嘅諗法，咁樣會舒服d。⠀
⠀
有時，你可能會溫到好頹、好想放棄，覺得自己頂唔順。但係記住，機會就得一次架姐，你唔會想俾自己有後悔嘅機會。唔好俾「搏盡無悔」單單成為你安慰自己嘅方法，因為你「無悔」嘅前提係你的確有「搏盡」。其實無論你放榜後成績幾好，只要你冇真正搏盡，你都一定會後悔。雖然我依家有呢個成績，但係你問我有冇d乜遺憾，我一定話有，因為我根本就冇「搏盡」。所以希望你地捱埋呢兩個月，唔好俾自己後悔嘅機會。當你想hea、唔想溫習嘅時候，你可以提番自己，你考完dse就有三個幾月可以想做咩就做咩，唔需要再溫習，你到時再玩盡佢hea盡佢都唔遲。同埋你可以想像下，你過左一年會係點樣樣，你會做緊d乜？如果你入到A1，你嘅大學生活係點樣樣？我相信你依家辛苦多兩個月入到a1從而得到嘅滿足感一定大過你依家睇youtube睇多10個鐘所得到嘅滿足感。所以當務之急就係要努力溫書先，最緊要就係要對得住自己，唔好令自己後悔。亦都係因為咁，當d人問我aim高分d入自己興趣大d嘅科好定係aim低分d入一科你實入到嘅科好，我永遠都係會話aim高分d好，唔好覺得自己入硬你想入嘅科而唔需要咁努力，因為過左dse之後你一定會好後悔點解自己當初唔搏盡。你搏盡，的確唔可以guarantee你實入到A1，但係起碼你問心無愧；相反，你唔搏盡，就一定會遺憾終生。⠀
⠀
仲有啊，唔好成日同人比較，你可能會喺studygram見到人地好努力，寫好多notes，作好多文，操成十幾次pp，但係可能人地中四開始已經日日搏盡老命去溫書、aim做狀元呢？如果你唔係aim做狀元嘅話，你冇必要同果d人去比較，顧番掂你自己就ok。同埋，溫得多唔代表一定有用，溫得少都有唔代表一定冇進步，人地寫得多notes亦都唔代表佢實有好大嘅進步，一切其實都係睇番果個溫習方法啱唔啱你自己姐。有機會係人地work hard but not work smart呢，又或者你地所適合嘅方法根本唔一樣，有機會人地要寫notes先有進步，你靠另外一d方法都已經可以進步。所以同其他人去比較完全係不必要嘅。⠀
⠀
你地呢一屆比較唔好彩，又要經歷一d影響自己情緒嘅社會事件，依家又有個武漢肺炎，令到你地嘅溫習進度受到嚴重影響，你地真係辛苦曬啦🥺我相信你地捱左咁耐，都一定有能力同埋決心捱埋落去，你地好快就可以脫離苦海架啦！希望（如果你a1係中大嘅話）我下年可以喺中大見到你地啦🙆🏻♀️加油啊💪🏻⠀
⠀
dsehighbanana上⠀
2020年2月26日
DSEHIGHBANANA 